Thursday, October 12, 2006

ست بيت شاطرة

حصل إيه يعنى إن الطبق الصينى انكسر و أنا بغسله ، اتزحلق من إيدى و هية مليانة صابون.
و مش مشكلة أوى إن الجيران شموا ريحة الأكل بعد ما اتحرق، أنا كنت سايباه يسخن و التايمر هو اللى ما رنش.
و فدايا القميص اللى اتحرق و أنا بكويه، ما اخدتش بالى إن المكواة متسابة على درجة عالية كدة.
ومش كارثة يعنى إن الشراب وقع منى و أنا بنشر الغسيل، إيدى اتهزت فجأة و ما لحقتش أمسكه و هو صغير كدة.
و الدنيا ما اتهدتش لما بلوزتى البيضة أم وردات زرقاء طلعت سودة من الغسالة، ما توقعتش إن البنطلون الأسود ينّزل لون بالشكل دة.
و مش أزمة إن الشوربة طلعت حادقة أوى كدة، أنا قلت أزود الملح سنة علشان تبقى حلوة.
آه كان مؤلم أوى لمّا وقعت من على الكرسى و أنا بنضف نجفة الصالون.
و لمّا دخلت فى صباعى بالسكينة الجديدة الحامية و أنا بقطّع البصل.
و يا حرام لّما الزيت طرطّش عليّة و هو بيغلى، و أنا بقلى البطاطس المحمرة.

لكن كلها حاجات طبيعية بتحصل كل يوم و لكل واحدة، ولا يهمنى، فى الأول و فى الآخر، أنا ست بيت شاطرة ... و لهلوبة كمان!

32 comments:

H Y M N S said...

في رثاء الاعلون للفاشلين أمثالي . كده انا و انتي و أي حد بيطبطب ع النقص بيقولوا . حتا لو شايفنها تفاؤل و ثقة بـ فداحة !
بس مفيش حل للإستمرار إلا بتاع كده : )

..

Alaa said...

أفضل طريقة لرفع مستوى الثقة بالنفس لأي ست بيت هو تبديل أو توسيع مهام راجل البيت.

لو عندك أي شكوك في شطارتك في الطبيخ خليه يطبخ كام يوم ورا بعض، حتى الرجالة المبدعين في الطبيخ اللي ممكن يكسبوا الستات هيبهدلوا نفسهم و المطبخ أو هياخدوا وقت عبثي و يحولوا الطبيخ لسلوك غير عملي بالمرة أو هيشغلوكي و أي حد ثاني موجود في البيت معاهم.

Dido's^^^ said...

Loooool :):):):):)
طبعاً ست بيت شاطرة و لهلوبة .. حد يقدر يقول غير كده !؟؟
زييّ بالظبط

Eman M said...

يا جماعة ما تفهموش غلط .. أنا مش بتكلم عن نفسى .. دى قطعة قصصية بحتة.

و ما حدش يقدر ينكر طبعاً إن فيه حاجات من الحاجات المعروضة فى القطعة ديه بتحصل مع كل واحد و واحدة فى أمور البيت طبعاً.

salateenoo said...

ربنا يستر عليكي وعلى جوز وعلى عيالك وعلى العمارة والحي والمنطقة اللي انتي ساكنة فيها....

عاملة زي واحدة زميلتي في الشغل لقيتها جاية مدايقة بقولها مالك.. قالتلي حصلتلي مصيبة النهاردة الصبح ..يا ساتر يا رب ازاي..؟؟

بابا قاللي اسلقيلي بيضتين عشان افطر ..رحت وحطيت البيض على النار ...ورحت عشان اكمل لبس هدومي ..شوية وسمعنا صوت فرقعة جامدة جاية من المطبخ...رحنا لقينا النار مولعة في الكسرولة اللي فيها البييض...قعدنا نطفي في النار وماما بتقوللي ...هوة انتي حطيتي مية قليلة ولا اييه؟؟؟

قولتلها :

هوة انا المفروض احط ميية !!!!!!!!

ماشى الطريق said...

loooooooooooooooooooooooool
معلش هى فى الأول كده

Lasto-adri *Blue* said...

ايوة صدقينى
اهم حاجة الثقة

وايه يعنى فدا الست اى شئ ينكسر او ينحرق.. المهم انها بخير
:D

حــلم said...

والله بيحصل
بس مش كله فى يوم واحد
الحياة مراحل
النهاردة لسعة وبكرة جرح
وبعده قميص محروق

ويا ما بنشوف

علشان نتعلم
:)

مصريون بلا حدود said...

وهيا الحياة يبقالها طعم من غير الحاجات دي متحصل
بس على فكرة
ممكن الواحد يغلط مره
بس في المرة التانية
لازم اسأل نفسي ليه نفس الغلطه تتكرر
اكيد فيه سبب

كلمه said...

da 2eh elseka de kollha :D ... loool ....dnty lo2ta lw feh menek etneen kanet 5erbet :)))

زهقت منك يا سكوت said...

الحاجات دى بتحصل كل يوم معاكى لكن الاهم من حدوثها لاى ست الطريقة اللى بيتفاعل بيهاجوزها هل بيطنش ولا اكنه واخد باله ؟ ولا بيعزرك ؟ ولا بيمسك فى خناقك ؟ والرجالة مش زى بعضها طبعا .. وربا يستر

توتة توتة said...

انتي فعلا ست بيت شاطرة وشاطرة جدا كمان عادي كل الحاجات دي بتحصل

Aoossa said...

أيه يعنى لما تشيلى جوزك وتهشيكيه فى البلكونه فيوقع منك
فداكى كلها حاجات صغننه

FrEe.PhArAoH said...

اتخيل واحده بالصفات دى زوجتى

ربااااااااااااااه .. الحياة باسمة اكثر من هذا .. شنيع مجرد التفكير :(

اكيد انتى ست بيت شاطره .. لكن من طراز خاص :)

افكارك جميلة

تحياتى

Bent Masreya said...

جميلة اوى يا ايمان
:)


طب والله الست اللهلوبة الشاطرة لازم تمر بكل الحاجات دى الاول
وتجرب وتغلط وتتعور وتتألم وتتعلم وتتفادى وتبقى مفيش زيها

ولما الزمن يمر، هيجى ابنها اللى متجوز ياكل عندها لقمة حلوة بدل اللى بتأكلهوله مراته كل يوم.. ومراته بتتعلم بردو عشان هتبقى ست بيت شاطرة

Engy said...

:)))
nice post Eman:)

Nerro said...

بس يا ريت في شطارتها :)

tamer afify said...

طبيعي ان الواحد فيه حاجات بيعرف يعملها وحاجات تانيه مبيعرفش يعملها
بس انا عندي سؤال
انتي بتعرفي تعملي ايه؟

santakarim said...

لنا الله
:-)

Abdou Basha said...

إيه يعني لما أنضف المسدس بتاع جوزي فتطلع منه رصاصه في نافوخي أقوم أقع على ضهري فأخبط في جوزي اللي بيبص من الشباك فيحاول يمسك في أي حاجة فيمسك في الواد الصغير ويقعوا الاتنين في الشارع.
..
أعتقد دي النهاية الطبيعية لهذه الأسرة السعيدة، النهاية مقتبسة من فيلم أجنبي مش فاكر اسمه كانت نهايته إن الجميع قتلوا بعض بالخطأ.
:))
**
كل سنة وانتي طيبة
وربنا يبعد عنا شر الكوارث المنزلية

**AD** said...

و نِـعم ربة البيت هذه !!
و ما سبيل النجاح في المطبخ غير التعلم من الصِـغر حتى النضوج ،،

و الإنسان غير معصوم من الخطاء ، يعني ممكن يوقع كوب أو صينية بس مش بدوام
رسمي !!

لكنني أتمنى ألا تكوني ست بيت شاطرة كما كتبتي ،،،،

شرفني أن أعلق في مدونتك

و السلام ختام

shalaby said...

هتعملي اية اكتر من كدة هتقطعي نفسك شاطرة يا لهلوبة

3lool said...

ههههههه طيب ربنا يستر ومش يبقي كل البنات شاطرين كده

اول مره ازور صفحتك والموقع كله
لكن بصراحه اعجبت بصفحتك جدا واسلوبك فوق الرائع

KEEP IT UP

shaimaa said...

والله انت عسل
انا مستعدة اديكى كورس مكثف لو تحبى
:D
تحياتى

Abu Salah said...

lovely written ur style is very simple easy and swifty
u make me read more and more
keep the good work
u r gifted

IRC President said...

First time I fried was peaceful thanks God, the problems were from the third time. Even my mom is shocked when I tell her my experiences. (I live alone)

For example when I tell her I put veniger on boiling oil and nothing happened, she is shocked and tells me thanks God nothing happened.

Rabena yedemha 3aleena ne3mal :D

أُكتب بالرصاص said...

ست بيت شاطرة


المقال بتاعك نسف الجملة من اولها لأخرها

ست ؟؟؟

وفي البيت !؟؟؟؟
وكمان شاطرة


!!!
فيها ايه لو

والا بلاش؟!

:)
احيكي بغض النظر عن اي اطروحات قد تنسف النظرية
او تنسف البيت
وسته

Dmo3 Al Kohl said...

شاطرة

شاطرة

ايوة شاطرة
وإلا ماكنتيش حاكيتى على كل الحاجات دى
بس الحياة تجارب بردو

Ma3t said...

فطست على نفسى من الضحك
ربنا يخليكوا لبعض
ايوة ست بيت شاطرة, و اللى يقول عكس كدة حطى صوابعك فى عينه

ايمان said...

ايــــــــــــــــــــــــه يعنى
ايوه انتى ستات بيت فى بعض
ايه يعنى لما تنسى المفتاح فى الباب من جوه وتنزلى
وتيه يعنى لما تنامى ويتروحى فى النوم قدام التى فى لحد الصبح
وايه يعنى لما المكرونه البشاميل تطلع مكرونه بالطريقه الكازاخستانيه
عااااااادى جدا بتحصل معانا كلنا
عاااااااااااادى جدا

د/اجدع بنوته said...

واضح فعلا انك ست بيت شاطره ياايمووو

وده ميختلفش كتير عن نفس شطارتى طبعا

ويتشارك فيها معانا كل بنانيت الجيل الحالى

ده احنا جيل شاطر اخر حاجه يعنى

مسلسل ادم 2011 said...

الكلام دا كبير

 

eXTReMe Tracker