Tuesday, November 01, 2005

لو كنت عصفورة

كانت السما دى كلها هتبقى ملكى .. أنا لوحدى .. أطير وقت ما أحب و مكان ما أحب .. أغنى براحتى و أرقص براحتى ..

كنت هصاحب عصافير كتير .. نتفسح سوا و نطلع رحلات سوا ..
و لما نلعب استغماية .. كنت هادوخهم ورايا .. استخبى فى سحاباية .. و أخرج من سحاباية .. و أنزل أدًّارى ما بين فروع الشجر

و لما الدنيا تمطر، كنت هأخرج أرقص فى المطر .. و أبِّل نفسى .. أحوش المية فى جناحاتى و أطرطشها دواير فى الهوا

كنت هاخد بالى ما أقربش من الشمس .. و أعمل حسابى أسهر شويتين و أطلع أقعد مع القمر .. و نتفق نملى الكون نور و غُنا

كنت هصاحب فراشاية .. بجناحات ملونة .. أشيلها فوقى و نطير سوا ..

و لما أبرد أنزل أتدفى فى حضن وردتى .. كل الوردات تبقى صحباتى .. بس وردتى حاجة تانية ..أنا و هى متفقين فى كل حاجة .. لازم كنت هأعدى عليها كل يوم .. تحكيلى و أحكيلها .. نحكى حواديت لغاية ما عنينا تتاوب .. أبوسها و اطلع عشتى

طيري طيري يا عصفورة

----------------------------
الصورة: Fischer's Lovebird - 15Sep04 by Eman M

12 comments:

Rain said...

Wow...that's very sweet and dreamy.

ماشى الطريق said...

شكراً على الدقىقتين الحلوين اللى انا عشتهم وانا بأقرا القطعة دى

ensanbey7ess said...

احساس عالى قوى ...:)

كل سنة و انت طيبة

littilemo said...

really good

Anonymous said...

بجد كلنا محتاجين نبقى عصافير
وعلى رأى عمنا نزار



يا وطني

كل العصافير لها منازل

إلا العصافير التي تحترف الحرية

فهي تموت خارج الأوطان

وليد said...

يا خوفى
متلاقيش الا رصاصه رش وينتهى الحلم
طوارئ بقى

Anonymous said...

wow ya Emy, so sweet,innocent, and super sensitive...gamila awi, ana kaman nefsy akon 3asfoora :)

Zeinobia said...

it is very beautiful Eman

Zeryab said...

ده انتوا مصرين بقى انتى وتواصل تفكرونى بالأغنية

Pianist said...

حلو اوي بساطتك

sydalany-وش مكرمش said...

ما أنصحكيش تبقي عصفورة
إسألي مجرب
أنا كان جناحي م السما للسما
كانت عيوني الندى و قلبي رفرفة الحمام
بس للأسف
ع الأرض إنسان ف وسط الديابة
ف السما عصفور ما بين الجوارح

بالمناسبة
ده لينك الأغنية
ده بصوت ماجدة الرومي
http://gulf.salmiya.net/songs/kids/ram/kids147.ram

و دهلينكة الأصلية
http://www.sawari.com/7/5/Pola-pola.mp3

Ahmed Shokeir said...

بس ماتنسيش كمان لو كنت عصفورة .. ممكن تقعي فى شبكة صياد .. يقتل كل حاجة جواكي

 

eXTReMe Tracker