Monday, September 19, 2005

دلق القهوة خيـر

بقالى فترة عايزة أكتب عن الموضوع ده لحد ما لقيت محمد كتب عنه، عقائد وافتراضات و إيمانيات غريبة، مش مجرد أجدادنا بس اللى مؤمنة بيها .. لكن أباهاتنا و أمهاتنا و قرايبنا و جيرانا و أصحابنا و ساعات نفسنا.
ما قريتش كتير عن الجن و العفاريت بس مش فاهمة إيه علاقة بعض التحذيرات الجاية دى بالموضوع ده. فيه حاجات نفسى أفهم تفسيرها بس مش عارفة إزاى

- فى المعتاد لو الواحد مقدرش يمسك دموعه بيجرى على الحمَام عشان ما يبكيش قدام الناس، تلاقى ناس بتصرخ فيك، إوعى تعيَطي فى الحمام..ليه يا جماعة؟
غلط غلط، طب أخرجى عيطى برة، بس بلاش الحمَام خالص

- لوحسيت بآكلان فى إيدك اليمين، يبقى فى ضيف جايلك فى السكة و هاتسَلم عليه لوحسيت بآكلان فى إيدك الشمال، يبقى فى فلوس جايالك فى السكة و هتقبض

- لو عصفورة معدَية فوقك و وقَعت عليك حاجة، يبقى هتتكسى قُريب

- لمَا تجيب عربية جديدة، علَق فيها فردة جزمة من قدام أو من ورا، عشان لمَا يجى حد يحسدك عينه تيجى فى فردة الجزمة فيستغرب فميحسدكش

- لو سِنَة من سنانِك وقعت، إرميها للشمس

- لمَا تكون ضيف عند ناس، لازم تشرب كوباية العصير كلها، لو سبت حاجة فيها، البنات اللى فى البيت دة مش هتتجوز

- لو حمامة باضت جنب شباك البيت، يبقى فيه خير جاى

- أخطر حاجة هى موضوع قلب الشبشب، لازم تعدله علطول أول ما يتقلب (أهى دى من الحاجات اللى نفسى أفهم ليه)

- لو بصيت فى عيون قطة سودة، يبقى فيه حاجة وحشة هتحصلك

- ما تبصيش فى المراية و الدنيا ضلمة

- لو كحيت فجأة أو شرقت، يبقى فيه حد بيجيب فى سيرتك

- ما تلعبيش بالمقص فتح و قفل من غير لازمة، علشان بيجيب نكد للبيت (على رأى صديق: على كدة الحلاق عمره ما شاف يوم حلو)

- ما تحُطيش إيشارب ورا رقبتك و تحركيه يمين و شمال، يا متحركهوش كدة يا تشيليه خالص

- لمًا تقصى شعرك، إوعى ترميه

- لو غسيل جارتك اللى فوقك نقًط على غسيلك، يبقى هيجيلك خير (هبقى أوصى جيرانَا يدلقوا ميَة علينا كل يوم)

و طبعاً ما ننساش إن دلق القهوة خيــــــــــــــــــــــــر

8 comments:

حـدوتـة said...

أيوه أنا كنت ناسية المنديل اللي ورا الرقبة ده...بس متهيألي الناس بتتشاءم من الحركة دي علشان شبه الولولة اللي الناس بتعملها في المياتم

أول مرة اسمع الجزمة اللي في العربية دي!

لازم نسأل أكتر في موضوع الشبشب المقلوب ده...نفسي أفهم ليه

Ahmed Shokeir said...

هاها .. كل الحاجات دى مرت بيا وماحصلش حاجه
عيطت فى الحمام وماحصلش حاجه
حسيت بأكلان فى كل حته وماحصلش حاجه
قلبت الشبشب وماحصلش حاجه
العصفورة عملت كاكا عليا وماحصلش حاجه
بس مش عارف حاسس ليه إنى عينى الشمال بترف .. ربنا يستر

سامية said...

أيوة وفيه واحد كمان غريب أوي: لو عينيكي دمعت وانت بتقطعي البصل تبقي غيورة جدا على الشخص اللي بتحبيه! على كده بقى مفيش بني آدم مش غيور!

ووفيه كمان السلام بالإيد الشمال يجيب حظ وحش. طيب لو واحد أشول يعمل إيه؟

beastboy said...

ولو فتحتي شمسية جوا البيت تجيب نكد، واكتشفت أن ده كمان معتقد سائد في الأرجنتين عند الجيل القديم

فيه مثل حلو قوي بيقول "دلقوا القهوة من عماهم وقالوا الخير جاهم"

sydalany-وش مكرمش said...

ياه
في حاجات ياما ما أعرفهاش

ملحوظة:
حكاية الغسيل دي لو شفتي فيلم السادات إتفسرت على إن ف مصر في فتنة طائفية

shady said...

اللى بيخاف من العفريت بيطلع له يا شقير

Anonymous said...

أنا عارفة تفسير موضوع لو قصيتي شعرك اوعي ترميه... دا معتقد قديم معناه ان ممكن حد ياخد شعرك باعتباره جزء منك (او من الكتلة الاكتوبلازمية بتاعتك) ويعملك بيه عمل (سحر وحش يعني)ودا موجود مش بس في مصر لكن في تراث كل شعب مؤمن بالسحر زي القبائل الافريقية مثلا

meho said...

مادريتيش يا ايمى ان فى حاجة نسيتيها هو أن كسر الزجاج خير عشان منع خناقة أو مشكلة كانت هتحصل وكمان لو حد مات أهل الميت ما يقموش يوصلوا الناس الى بتعزيهم قال عشان دا فال وحش يعنى بيقولوا أنه بيفولوا أن حد هيموت وفى تانى فى نفس البيت و فى حاجة أخيرة أن الواحد لما يقعد يتاوب كتير دى معناها أنه محسود ...ويجعله عامر

 

eXTReMe Tracker