Monday, March 06, 2006

فلنبك سوياً، قوياً كنت أو ضعيفاً

الدموع اتخلقت علشان تخرج من العين، و احنا أوقات كتير بنعاند الطبيعة و بنحبس دموعنا جوانا، تتجمد و تتحجر، و بنعمل قواعد عجيبة اسمها ضعف و قوة لتبرير تصرفاتنا و أفكارنا

هو: يا ابنى عيب كدة، خليك رجل، الرجّالة ما بتعيّطش

هى: أنا مش قوية زى ما انتم فاكرين، انا ما أقدرش أبكى قدام الناس بس، لكن أول ما أقفل علية باب أوضتى، بأبكى براحتى

هو: أنا مش فاهم ليه ان دمعة تنزل من عينى دة يقلل من شأنى؟

هى: عنية وارمة كدة لية؟ آه معلش، أصلى كنت بعيّط طول الليل

هو: تعرفى ان انتى بتبقى جميلة أوى و انتى بتبكى؟

هى: للأسف ما بعرفش أمسك دموعى، بيفضحونى علطول فى أى موقف صغير اتأثر بيه

هو: خلى بالك، الست ممكن تستغل دموعها كويس أوى و تأثر عليك باللى هية عايزاه منك، فما تتأثرش بسرعة كدة و تستسلم

هى: نفسى أتجوز واحد حنين، لما أعيّط ما يقوليش كفاية و اجمدى شوية و الكلام دة، لكن ياخدنى فى حضنه و يطبطب علية و يقولى عيّطى كمان و كمان

14 comments:

Anonymous said...

ساعات فعلا بنحط قواعد لدموعنا..بس اللي بيحصل غير كده...أقوات مش بنعرف نتحكم في القواعد دي خالص..علي حسب الموقف يعني...أصل احنا مش روبوتس. بس بنعمل حركات و كده

bluerose said...

تعرفي يا ايمان اني دائما ما اقول ان الدموع شيء عادي , و مريح و ليست عيبا ولا ضعفا
و مع كدا انا اول من يخفيها و يحدد وقتها, ماعرفش ليه

Anonymous said...

زمان في المدرسة قريت حاجة على لسان شخصية في قصة:
"الكبار لما مابيبكوش دموعهم بتنزل لجوه على قلبهم لحد مايتحجر"

ensanbey7ess said...

هو: يا ابنى عيب كدة، خليك رجل، الرجّالة ما بتعيّطش

ديه واحدة من تقاليد مجتمعنا اللى بتفترض ان الراجل لازم ميعيطش و لكن اللى بيحصل غير كده , لان الرجالة كمان بتعيط , يمكن مش بسرعة زى البنات و لكن الراجل لما يعيط فتأكدى انه كان شايل كتير قوى لحد ما فاض بيه و مبقاش قادر يستحمل
و بعدين مش كل البنات دموعها قريبة و مازلت على نفس رأيى فى البوست اللى فات ان الموضوع مالوش علاقة بهو او هى و لكن بانسان و انسان و ظروف محيطة

santakarim said...

هى: نفسى أتجوز واحد حنين، لما أعيّط ما يقوليش كفاية و اجمدى شوية و الكلام دة، لكن ياخدنى فى حضنه و يطبطب علية و يقولى عيّطى كمان و كمان


أظن الكلام ده ممكن يقولوا راجل برضه

Eman M said...

لا يا بلو روز، سبيها على راحتها

لا يا كريم، مش بيقولوه :( - أو الأغلبية يعنى

littilemo said...

العياط ده نعمه من عند الله
اى والله
الواحد بيبقى نفسه يعيط علشان يرتاح
ولكن الدموع مش عارف ليه مش سهله
وايه يعنى قدام الناس

المهم الواحد يرتاح
انا لما بشوف حد بيعيط لما يزعل بنبسط
لانه هيبقى كويس
المشكله اللى ما بيقدرش يعيط او بيحبس نفسه
بيتبهدل

The new kid in the blogger said...

hi ya eman I am sorry that I didnt check your blog earlier nice one so now I can enjoy all what you write without waiting for you to post on ptp. and I agree that we put rules for tears here although it is one of the bless

Mr-Biboooo said...

مش عارف ليه انا شخصيا مقتنع ان الدموع دى حاجة شخصية جدا و انها بتفقد معناها لما بتكون مع الناس

بحس ان الدموع بطهرنا من جوانا لما ترتبط بالوحدة او بصديق حقيقى واحد يقدر الدموع

لكن الرائع هنا هو انك قدرتى توزعى الادوار صح ما بين هو و هى

عشقك ندي said...

دعوة جميلة جدا بس المشكلة زي ما قولتي في موروثاتنا المهببة اللي مخلية دموع الراجل عار عليه ودموع البنت دموع تماسيح هي خلاوتها لو نسيبها كده من غير ما نفسرها واللي عايز يبكي يبكي وما فيش اخلي من غنوة منير ابكي لو في عيني دموع

Nour said...

ياللا نعيط

:'((((((

shababik said...

ان شاء اللة
بس لما تكوني بتعيطي عشان حاجة حصلت مش حاجة عايزاها تحصل؟
طبعا مش انتي هي ياعني
الا قوليلي اعرف ازاي ان البنت اللي بتعيط ادامي من النوع الاول ولا التاني؟
ارجو الافادة؟

شريف محمد said...

كلامك مظبوط
مع انه مجرد افراز انفعالي (ايه الكلام الكبير دة؟) زي الزعيق والقهقهة الخ... الا ان المجتمع فعلا هو اللي فرض توزيع الانفعالات دي علينا حسب الجنس ..
الراجل الغليظ ذو الجاعورة والقلب الجبس الذي يكتم حنفية مشاعره في بأس
والست الضعيفة الحساسة .. قابلة للكسر .. وتجيد استغلال الدموع لنيل المئاّرب فلاتصدقوها دوما
ياريت نركن الفروق الجنسية على جنب واحنا بنتكلم عن المشاعر

Anonymous said...

في بعض الأحيان والمواقف تسقط الدمعة من عين الإنسان عندما يكون إنسان ذكراً كان أم أنثي
......
أنا شخصياً مش بيضايقني الدموع بقدر ما بتضايقني مناخيري لما بتسيح المنظر بيكون مش عاطفي خالص

 

eXTReMe Tracker