Saturday, June 11, 2005

و رحل عبد الله محمود


لسة فاكرة كويس أمَا محمود سعد كان مستضيفه قُريب فى البيت بيتك ، بعد وفاة أحمد زكى بحاجة بسيطة
لسة فاكرة آثار المرض على وشه و جسمه و راسه اللى من غير شعر
لسة فاكرة ابتسامته الهادية و روحه الجميلة و هو بيحكى عن الألم اللى مر بيه و رحلة العلاج وعن مراته وأولاده
لسة فاكرة كلامه عن تأثير القرآن اللى مشغله فى أوضته فى المستشفى علطول عليه وعلى نفسيته و احساسه
لسة فاكرة فنان محترم و شخصية قوية مؤمنة كنت باعزها جداً
فى الجنة إن شاء الله يا عبد الله

خوفى من المرض دة بيزيد كل يوم، حالة ورا حالة بتحصل قدامنا والحالات بتزيد بطريقة عجيبة
أنا مش خايفة من الموت "و لكل أجل كتاب"، و لكن سيرة المرض والعذاب والآلام والعلاج و إنك تلاقى حد يستحملك و يقف جنبك بجد من غير ما يكون بيعمل كدة واجب عليه أو إشفاقا بترعبنى
رحمتك يا رب

3 comments:

Lasto-adri *Blue* said...

ربنا إغفر له
أنا كنت بحب فنه.. لأنه من القلة المحترمة

عموما يا إيمان متخافيش من المرض دة.. متعرفيش الخير فين..
و مهما كان، عذاب الدنيا أفضل ميت مرة من عذاب الآخرة..
و كله تخليص ذنب

محمد هشام عبيه said...

أعرف كثيرا بات خوفهم من هذا المرض مرضا في حد ذاته..المفزع في السرطان أنه سرطان لايعرف المرء من أين يهاجم ولا كيف يتنشر..لكن أدرك أن الأزمة ليست في المرض بقدر ماهي في أن يكون حول المرء بشر يساعدونه على قهر المرض
..أراك قد بدأت تكتبين بالعربية..هذا جيد لمن هم مستواهم في اللغة الإنجليزية إحم..يعني..جيد..مثلي!

Anonymous said...

رحمه الله رحمة واسعة.....على فكرة يا جماعة مرض السرطان منتشر في العالم كله حتى كندا....اخر احصائية هنا في كندا قالت ان اربعة من كل عشر رجالة ها يصابوا بالسرطان
والستات ثلاثة من كل عشرة...
تخيلوا دي؟

 

eXTReMe Tracker