Saturday, December 31, 2005

حديث الأصابع

تأثراً ب امسسني ... فأحيا و بمجرد اللمس

ما أقدرش أشوف لوحة أو صورة و ما ألمسش تفاصيلها بأطراف صوابعى
و الخشب المعشّق و شغل الفرفورجيه و حاجات الخزف و الصينى
و الإزاز الملون و الشمع و السيراميك المرسوم عليه

بحب ألمس ورق الشجر و الورد خاصة لما يكون مندّى
وبحب ملمس القطيفة و القطن و الجلد الطبيعى
و ورق الكتب القديمة و حتى الجديدة
و سرسوب المية المندفع من الحنفية
و صابونة الوش أول ما تنفتح من كيسها
بحب أمرر صوابعى على الكيبورد كأنى بعزف
و الماوس و السى دى و شاشة المونيتور

و أكتر حاجة بحبها إن المطر يلمس وشى
و أحب لمسة مسح الدموع من على الخد


بأحب ألمس الدقيق و هو مفروش قبل العجن
و أحب فركة الملح و الفلفل الأسود
و حبات الرز و هى بتتنقى و الشعرية قبل ما نحمرها
و المكرونة المقصوصة فى المية بعد ما تتسلق
و الطماطم و الخيار و الفلفل الأخضر الطازة

و بأحب ألمس برجلى رملة البحر المبلولة
و البلاط و هو ساقع
و الأرض و هى غرقانة مية
و الخشب و هو دافى و السجاد لما يكون ناعم

ما بعرفش أشوف طفل و ما ألمسش وشه، عينيه، ودانه، شفايفه، كف إيديه و رجليه


لما أكون بردانة، بادفى إيدى الشمال بإيدى اليمين
و لما أكون متضايقة، بأفرد اليمين و أطبطب عليها بالشمال
لما أقابل صديقة، إيدى تلقائيا بتتجه لإيديها، أو على كتفها، بحس إن دى أكبر وسيلة تواصل بمعنى "أنا بحبك"
و أمّا أشوفها حزينة، بأبقى عايزة أخدها فى حُضنى و أحتويها كاملاً من غير ما هى تتطلب

17 comments:

ماشى الطريق said...

الله بجد بسطينى من أول لمسة

MoonLightShadow said...

Very touching!

Zeinobia said...

I was touched by these beautiful words
happy new year

shady said...

بس تعرفى إن فى ناس ما بتحبش حكاية اللمس دى فى لغة التعامل اليومى
لكن بالتأكيد مش من كل الناس

Anonymous said...

معنديش حساسية جامدة اوي لللمس زي اللي عندك يا ايمي...بس الأحساس حلو قوي

littilemo said...

اهديلك اغنيه من اول لمسه لمحمد منير

Nightlegend said...

Touching is Believing

Mr-Biboooo said...

احيانا اللمس بيوجع

لما بنتفقده

ثانيا انتى وجودك فى اى معرض و لا متحف هيسبب مشاكل هههه

AUCWORKERS said...


اجدتي الوصف والاحساس
برافو
وازود عليكي
ملمس وريحة الكتاب اول مانشتريه
بيكون له عالم مميز مختلف
ملمس التمثال بانحناءاته والبروزات المختلفه في تفاصيله
ملمس وريحتة القلم الرصاص وهو بيخط على الورق الابيض
ملمس فرو القطه واللعب في دقنها ورقبتها
ملمس صوابع الطفل الزوغير وقد ايه صغير حجمها
ملمس حاجات ياما
بشكرك جدا على الموضوع اللي فكرني بحاجات اكتر

عشقك ندي said...

عاشق اعشقني كاره اكرهني لكن اسمعني حاول تتغير غير غيرني
من أول لمسة
غير لي سنيني
نسيني رسيني علي أول مرسي

islam yusuf said...

اللمس هى الحاسه اكتر شاعريه و وحميميه و هى السلك العريان اللى بيكهرب المشاعر و يخللى الإنسان فى قمة النشوه الروحيه اللمس مش بس بين الحبيب و الحبيبه لأ بين الإنسان و الإنسان

Anonymous said...

begad gameeel awy awy e7sasak ya iman w ezay btwsfeeh.. mashaALLAH 3aleeky..

Anonymous said...

GAMIL fe3lan msh 3arfa ezay et2a7'art keda f fat7 modawentek fatni KETIR

Anonymous said...

سبحان الله

شوف كيف الناس تتشابه

أنا مثلك بالضبط

مدونة جميييييييلة

الله يوفقك

أختك كويتية

shababik said...

جميييييييييل.

zemos said...

ما شاء الله عليكي
عملتي تجميعه جميييييله أوي..
إحساس لو قلت عليه احساس فراشه أبقى بظلمك.. لأنه ميطلعش إلا من بنت و نقية جداً
و شكرا

Unknown said...

بجد أحساس عالى مووت خلتينى فى مووود حلو
شكرا جدا على الكلمات دى

 

eXTReMe Tracker